Anseye pou Ayiti
Anseye Pou Ayiti (APA) se yon mouvman sosyal ki genyen anpil manm e kap kontinye resevwa manm nan tout nivo nan fanmi an. Chak kategori manm ki chwazi patisipe nan mouvman an anba menm prensip ak valè yo, se tankou yon kominote ki gwoupe yo nan linyon ak tèt ansanm pou kontinye fè enpak endividyèl tankou kolektif. Pandan APA ap kreye mwayen pou ede nou chak kontinye enfliyanse kominote nou, li privilejye anpil aksyon ki vize tèt ansanm yon fason pou nou kapab rive fabrike kolektif nan tout aksyon nap poze.
Se konsa Depatman Anbasadè ak Patenarya (Depatman AP) nan APA bay tèt li misyon akonpaye Sitwayen-Lidè yo, Anbasadè yo ak Patnè nou yo. Akonpayman sa yo ap fèt sou fòm devlopman pwofesyonèl, reyinyon kominotè, konbit ak lòt aktivite epi opòtinite pou nou fè plis enpak toujou.
Anseye Pou Ayiti se yon nouvo jenerasyon sitwayen-lidè kap bay lidèchip transfomasyonèl la fòm e fè pledwari pou tout timoun jwenn yon menm nivo edikasyon ann Ayiti. Nou vle ekipe e kreye yon rezo 50,000 sitwayen-lidè anvan 2025.
Kisa Anseye pou Ayiti fè?[modifye | modifye kòd]
ANSEYE POU AYITI rekrite epi ekipe yon rezo sitwayen-lidè an Ayiti; anseyan, paran, direktè lekòl, aprenan pou transfòme sistèm edikatif la e kominote nou yo. Nap devlope yon mouvman lidè sivik kap fè pledwari pou tout timoun jwenn bon jan kalite edikasyon. Atravè chanjman nan sal klas anseyan-lidè nou yo, nan lekòl direktè-lidè nou yo, nan fanmi paran-lidè nou yo; n ap transfòme kominote nou yo. Sa nou vle pou sosyete nou an, n ap kòmanse transfòmasyon sa nan lekòl yo. Nou valorize kilti, koutim ak kominote, epi n ap travay pou nou ofri yon lòt modèl lidèchip k ap travay nan tèt ansanm pou nou reyisi ansanm. N ap envesti nan yon nouvo jenerasyon sitwayen[1][2].
Vizyon APA[modifye | modifye kòd]
Anseye Pou Ayiti anvizaje yon sistèm ansèyman ann Ayiti ki garanti dwa tout sitwayen peyi a genyen pou yo jwenn bon kalite edikasyon gras ak travay kap fèt pou ankouraje peyi a gen bon jan anseyan pou asire reyisit aprenan yo[3].
Misyon APA[modifye | modifye kòd]
Misyon Anseye Pou Ayiti se ogmante rezilta lekòl ann Ayiti nan fè rekritman epi devlopman pwofesyonèl anseyan pou lekòl ki deja egziste. Ansèyman ak lidèchip transfòmasyonèl pral bay tout aprenan yo konesans, konpetans ak mantalite yap bezwen pou yo rive akonpli sa yo ki kapab fè gras ak menm chans yo tout ap jwenn, pou yo rive lwen ansanm epi pou yo bay patisipasyon yo nan sosyete ki pi eklere nan 21èm syèk la[4].
- ↑ « Movement for Educational Justice » (in anglais). Retrieved 2023-10-28.
- ↑ « Reyalizasyon » (in anglais). Retrieved 2023-10-28.
- ↑ « Kesyon/Repons sou APA » (in anglais). Retrieved 2023-10-28.
- ↑ « Kowòt 2016 » (in anglais). Retrieved 2023-10-28.