Kremas

Kremas se yon bwason ki gen alkòl ladan l, li gen koulè krèm epi li dous. Li soti nan peyi Ayiti.

Bwason sa fèt sitou avèk kokoye graje apre yo pije li pou yo pran lèt kokoye a, lèt kondanse e sikre, lèt evapore epi wonm. Nòmalman yo plis itilize wonm ki gen ti koulè a, men yo konn sèvi ak wonm blan tou pou ranplase bon wonm nan. Yo ajoute divès kalite epis tankou kanèl, miskad , anis, avèk anpil lòt engredyan tankou esans vaniy. Resèt la varye soti nan yon moun al nan  yon lòt avèk ti kras diferans ki genyen nan engredyan yo. Sepandan, aparans jeneral la ak gou a rete menm jan an. Kremas se yon bwason ki trè popilè an Ayiti, yo sèvi li regilyèman nan evènman espesyal yo ak lòt gwo jou tankou  fèt Nwèl. Yo konsome kremas an jeneral lè li fre konsa tou yo ka bwè li cho tou. Bwason sa ki rele kremas la fèk komanse antre nan komès nan peyi Etazini e nou jwenn li tou nan anpil makèt nan peyi Ayiti.

Lyen deyò

• Resèt kremas sou manmieettatie.com
• fr Li nan tab la ː resèt kremas sou elle.fr
• fr kremas ayisyèn nan de gwo konpetisyon amerikèn sou lenouvelliste.com